السعودي والكويتيه (خالد وجمانه الجزء الثاني)

الجزء الثاني :

نزلت رولا الصاله و منحرجه ومو عارفه شلون تعتذر من خالد ..
خصوصا ان هذي فرصته الوحيده لان باجر الصبح
الساعه 8 الصبح طيارتهم للسعوديه

رولا : خالد بدي اعتزر منك بس جومانه تعبانه شوي ..و ما بتأدر تنزل
خالد عرف انه هذا عذر لانها لو تعبانه جد كان من
الاول الام ما تعنت و راحت لها فوق
خالد : مو مشكله .. باركي لها بالنيابه عني
و سلمي عليها .. و عن اذنكم
و قام خالد و يه عماد الديوانيه عند الريايل ...

خالد انقهر حيل من حركتها ... يعني اهو متعني و ياين من السعوديه
و الاخت حتى ما تكرمت تنزل لا يكون حسبالها ميت عليها
و على شوفتها .... كنت بس بشوف خشتها ... عشان لا انقهر زود بالعرس

باليوم الثاني رجع خالد و ابوه و نسايبه و العم وليد للسعوديه ..

و في الخبر

الهنوف ( اخت خالد العوده ) : ها بشر ... شلون الملكه ؟انشالله عدت اموركم على خير
خالد : الحمدالله سهالات
الهنوف : و العروس ... كيفها ؟؟ اوصفها لنا
خالد : ليش انا شفتها ؟؟
الهنوف فتحت عينها : هاااه !!! ما شفتها ... طب ليه ؟
خالد : مادري .. مرت عمي قالت تعبانه ...
بس ما ظنتي تصدق ... يمكن البنت فيها عله
العنود ( اخد خالد الثانيه و اكبر منه بالعمر ) : الله لا يقول ...
يووه يا اخوي لا يكون وقفعت بمصيبه و محد سمى عليك
خالد و ااهو يقوم عنهم : مادري مادري ... الله يستر بس

ريم : الا يما ... مرت عمي لبنانيه ... يعني اكيد جمانه لامها
ام خالد : مو شرط و انا امك ... بننطر و نشوف منله تشبه هل جمانه ...
الله يسخرها لولدي بس

الهنوف و العنود : امين

خالد كان عنده اختيين اكبر منه الهنوف و العنود ..
متزوجين من قرايبهم و عنده اخوه بدر الي اصغر منه
و يدرس بره ماستر ... و اخوه عبدالعزيز يدرس في السعوديه
و ريم الي هي اخر العنقود ببيت بو خالد

خالد كان مفور من داخله من الحركه الي سوتها ...
اهو مو ميت عليها بس يبي يشوف الي اختارها له الزمن
شنو وصايفها ... و طبعا خالد قرر انه ما يكلمها
و يرد لها هل حركه باقرب وقت ممكن .


الكويت

جمانه ما حست ان الملجه اثرت عليها بشي ... سمعت انها انملجت بس ما شافت شي .
عاشت حياتها طبيعيه و ما خبرت بنات الجامعه باستثناء مي الي عارفه بالقصه

مي : تعالي جمون ... يالله عطيني التفاصيل اشصار
جمانه : اشصار .. ملجت
مي : ادري .. شفتييه ؟؟ حلو ؟ جيكر ؟؟ واي الله يعينج مو خوش مفاجاه
جمانه : مادري ما شفته .. و لا يهمني اشوفه
مي فتحت عينها عل اخر : ما شفتيييه !!! من صجج
جمانه : ثاني يوم ردوا السعوديه .
مي : امبي اي شي ... اشهل ملجه بعد
جمانه : مي بليز لا تذكريني كل شوي السالفه كلش مو ببالي
مي : لا انتي مو صج .. مملوجه و تقول مو بالي
جمانه : قومي نلحق عل محاضره احسن .


مر اسبوع على الملجه ... ام جمانه لاحظت ان مافي اتصالات بين جمانه و خطيبها ...
و حتى اهل خالد لاحظوا انه ما يكلم زوجته و لا في شي متغير و يبين انهم اثنين مملوجين ..

ام جمانه كلمت الدكتور سالم
رولا : سالم .. حال بنتك مو عاجبني .. شو يعني تملك و ما تشوف زوجا
سالم : والله ينتج و تدرين راسها يابس
رولا : اي بس لازم نشوف حل ... لازم يشوفو بعض و تصير بينهم علاقه ..
بخاف عليها تتزوج هيك خيط لزق
سالم : شلون بالله ... اروح اقول له تعال علقها فيك
رولا : لا مو هيك .. بس انا عندي فكره ازا زبطت بتكون حل كتير مناسب
سالم : سمعينا فكرتج
رولا : شو رأيك نعمل لها حفلة ملكه .. و نعزم بيت اخوك كلياتهن ...
تكون حفله بسيطه هون بسرداب البيت
بس نعزم احبابنا و قرايبينا الي هون ... و هيك بيشوفها و بيأضوا كم يوم مع بعض .
سالم : بس بالسعوديه ما عندنا هل شي
رولا : اي عارفه .. بس هون الامر عادي .. و حنا بدنا نعملو هوون وين المشكله
سالم : مادري والله اذا تشوفين هذا حل مناسب .. كلمي مرت اخوي و اتفقوا .
رولا : خلاص عطيني رقمهم و انا بتفق معها .


طلعت رولا من عند سالم و قبل لا تكلم ام خالد حبت تعطي جمانه فكره

رولا : جمانه تعي بدي الك شي
جمانه : خير يمه !!
رولا : شوفي حبيبتي انا و بابا بدنا نعمل لك حفلة خطوبه صغيره
جمانه : ليش .. انا انخطبت و خلصت .
رولا : اي بس كان شي سكاتي .. و احنا بدنا نفرح فيك
جمانه : يما مالي خلق عوار راس الله يخليج
رولا : بعد امتحاناتك ... هلا باقي على امتحاناتك اسبوع بنعملها بعدهم على طول
جمانه : اي ليش يما عاد .. انا مابي حفله
رولا : جمانه انتي اول فرحتي و خليني افرح فيك .. منشان الله ما تكسفيني
جمانه : خلاص يمه .. الي يريحج ... اذا زواج و تزوجت ..
يت عل حفله .. سوها ما عندي مانع
رولا فرحت كثير و قامت تبوس بنتها حييل
رولا : يأبرني جمالك شو مزواه هل بنت ...
جمانه : على امي ..

كلمت رولا ام خالد و خبرتها و ام خالد قالت لها اشاور بو خالد و ارد لج خبر ..
بو خالد فرح بالبادره الي بتقرب الاهل من بعض و هذي فرصه
عياله يشوفون عيال اخوه و يشوفون عمهم
اتصلت ام خالد برولا و خبرتها انهم موافقيين ..
و اتفقوا على التفاصيل و على الملجه الي بتكون بعد 10 ايام
و اهم قبل الملجه بيوم انشالله بيون الكويت و بيضلون فيها اسبوع
دام انها عطلة نص السنه فرصه يشوفون الكويت

بعد اسبوع خلصت جمانه امتحاناتها .. امها كانت مجهزه كل شي
و شايفه جم نفنوف لجمانه .. و الي ناقص ان جمانه تقايسهم ..

و في السعوديه اشتروا الهنوف و العنود شبكه الماس لجمانه
بطلب من امهم و شرولها دبله و خاتم الماس زياده
و الام وصتها يشترون لها ساعه على اساس انها هديه من خالد ..
ردوا الهنوف و العنود من السوق تعابى .. قعدوا يراون امهم الاغراض

الام : الله لا يحرمني منكم ... حلوين ماشالله
الهنوف : يما تعبنا .. درنا واجد خفنا ذوقنا ما يعجبها
الام : الا بيعجبها .. حلويين

مر خالد و سمعهم يسولفون
خالد : ها جهزتوا حالكم ؟؟ ترى بكره السفر ..
تكونون موجودين اهني الساعه 9 بنحرك .. انشالله الغدا حنا عندهم
الهنوف : انا و العنود بنام هنا انشالله ..
خالد : اي زين ... بكذا ما راح نتاخر انشالله
العنود : خالد تعال شوف وشرينا لحرمتك .
خالد : اشوف راوني
شاف الاغراض .. و عجبوه
خالد : والله اخاف ان هل اغراض حرام فيها ... و تطلع ام السعف و الليف
الهنوف : هههه ... ما يندرى بنشوف .. كلها بكره انشالله و بنشوفها

اليوم الثاني الساعه 9 حركوا سيارتيين
خالد و ابوه و امه و ريم بسياره خالد الرنج روفر
و السايق بالجمس ياب الهنوف و العنود و عيالهم بالسياره الثانيه

اهم اختاروا يروحون طريج البر لان بيحتاجون السياره بمشاويرهم هناك ..
و الجو حلو و سفر السياره بهل وقت شي ممتع .

ام عبدالعزيز و محمد و عبدالله ( محمد زوج الهنوف و عبدالله زوج العنود )
كانوا بيون بيوم الملجه بالطياره
و ثاني يوم بيردون لارتباطهم باشغالهم بالسعوديه..

الكويت ( سلوى )

وصلوا عايلة بو خالد و كان الدكتور سالم مسوي لهم وليمه بهل مناسبه ...
ام خالد يوم شافت رولا استخفت .. قالت هذي الام كذا اكيد البنت بعد على امها ..
و قعدوا بالصاله الحريم و الريايل بالديوانيه .
تغطت ام خالد ... و دخلوا بو خالد و سالم يسلمون على الحريم ...
نزلت جمانه مع اختها الاء تسلم على عمها و بنات عمها ...
الهنوف و الريم و العنود يوم شافوا جمانه تخبلوا عليها و على جمالها ..
و سحرتهم من اول ابتسامه و دخلت قلوبهم من غير استأذان ...
الريم الي كانت شقيه دزت مسج بسرعه لخالد
( الله يعينك يا خوي على شين ما ابتلاك )
خالد قرا المسج و فهم انها جيكره و ضاق خلقه ..
قال فوق اني مغصوب اعيش معها بجابل وحده جيكره العمر كله .

جمانه : الريم انتي جم عمرج
الريم : انا 20
جمانه : العمر كله يا رب .. جريبه مني انا 18
الريم : ايي وين تدرسين
جمانه : بالجامعه ادارة اعمال .
الريم: الله يوفقك .. انا ادرس بكيلة التربيه عندنا

تغدوا العايليتيين و بعد الغدا اصر بو خالد انهم ينامون بالفندق نفسه
الي حجزه خصيصا لها مناسبه .و حجز وحده من قاعاته لحفلة الملجه ...
الام و جمانه انصدموا .. ما كان ببالهم حفله كبيره و ترتيباتهم على انها حفله عائليه صغيره
و موعد الحفله بعد يومين ... بهل يومين انشغلوا جمانه و امها ... حاولوا يعدلون على ترتيباتهم
و اتصلت ام جمانه بكل معارفها و عزمتهم عل ملجه .. و يه اليوم الموعود ..

خوات خالد كانوا راح يسون شعورهم و المكياج بنفس صالون الفندق ..
ام جمانه امها حجزت لها منيره الفرج ...
جمانه كان لبسها وردي فاتح و ابيض .. منفوش نفشه خفيفه ..
و فيه على قصة الصدر ريش ناعم .. والنفنوف كوكتيل ... و الضهر نصه طالع
كانت جمانه مثل الملاك يومها ... الي يشوفها ما يقدر يشيل عينه منه ...
جمانه تشوف بعينها انوثه و براءه مختلطين بشكل عجيب ..
جمانه بنص هل زحمه نست ان الزواج مصيرها ...
و كان الي ببالها الحفله و ترتيباتها و بس ..و ما درت
ان عقب الملجه لازم تدخل بحياة جديده .

وصلوا الحضور قاعة الفندق ...و كانوا الرجال بنفس الفندق بقاعه ثانيه ..
الدكتور سالم اقام وليمه و عزم كل ربعه علشان يتعرفون
على اخوه و عياله و نسايبه و اهلهم من السعوديه الي احضروا .

وقت دخول جمانه الصاله ... تسكرت الاضواء بالقاعه ..
و توجهت الاضاءه على البوابه ...و كان في صوت موسيقى عالي ...
الى ان انفتحت البوابه ... و كانت الاضواء على جمانه ..
و بموسيقى هادئه جدا مشت لي الكوشه ... الي كان يغلب عليها
اللون الابيض و الوردي ... و العرس كله ديكوراته ابيض و وردي و اسود
الكل كان منبهر بجمال جمانه ... و امها ما مسكت دموعها
يوم شافت بنتها الصغيره كبرت و صارت عروس ..
ام خالد كانت بقلبها تقرا المعوذات خايفه على كنتها من العين .
و خوات خالد فرحانين حيل بمرت اخوهم ... و الاء الصغيره
جنها ملاك واقفه عل كوشه ناطره اختها توصل .
وصلت جمانه الكوشه و قعدت و صاروا يباركون لها الحريم ..
ام خالد راحت لها و لبستها الخاتم و قالت لها هذي هديه مني ..
باست راسها جمانه و شكرتها
الكل كان فرحان بالحفله .. البنات يرقصون ..

لين صار وقت دخول المعرس .
رولا : الهنوف ... كلمي اخوكي شوفي ايمتى بدو يدخل .
الهنوف : انشالله

دقت الهنوف على خالد
الهنوف : خالد احنا بالقاعه .. متى بتدخل
خالد : و من قال لك اني بدخل ؟
الهنوف : نعم ... شلون ما بتدخل .. و الحفله
خالد كان حاط بباله يوم رفضت تشوفه جمانه .. و حاب يرد لها الطراق بشكل اقوى ..
و مقرر مسبقا انه راح يرفض الدخول بوقت الملجه ..
الهنوف : خالد الله يصلحك .. كبر راسك و تعال ادخل لا تقص وجيهنا جدام الناس
خالد : وليه اقص وجيهكم .. انا راح اي اجلس بغرفة العروس
و اهي جيبوها .. مثل ما نسوي بالسعوديه
الهنوف : ذاك بالسعوديه و حنا بالكويت .. هم لازم تدخل الصاله
خالد : الهنوف .. كلمتي و ما ثنيها .. انا راح استناها بالغرفه .

الهنوف الي انحرجت موت من اخوها و تصرفاته ..
راحت كلمت رولا و اعتذرت منها و فهمتها ان بالسعوديه
احيانا المعرس ينتطر العروس بغرفتها و اهي تروح له و من غير ما يدخل عل حريم

جمانه الي كلمتها امها حست بنار تغلي فيها ...
هذا من شايف نفسه ... و متكبر اشعليه
بس امها ترجتها عشان ام خالد و خواته الموجودين
انها تقوم تدخل لعنده .. و المعازيم عادي
مردهم بيعرفون العروس طلعت للمعرس على حسب التقاليد السعوديه .
جمانه الي حست لونها الابيض تحول للون وردي من الحراره
الي فيها قامت غصب .. عشان تدخل عنده

كان خالد جالس بروحه بالغرفه و منتظر ... و متذكر مسج ريم
و ضايق خلقه و ماله نفس يشوفها قال بقلبه ببارك لها و امشي .

خالد و اهو جالس صمع صوت اليباب يقرب من الغرفه ..
و سمع اصوات الحريم قربت .. فجأه تبطل الباب

رفع خالد عينه بكل برود .. و اهو يدعي بقلبه انه يكون جكرها عل اقل مقبول ..
حتى يقدر يعيش وياها و انصدم بلي شافه ....
شاف انسانه الانوثه تتفجر من عيونها .... و جسمها و لا اروع ..
و مع النفنوف الي كاشف جزء كبير من كتوفها و صدرها ...
انصدم خالد بلي شافه .. و عرف ان مسج ريم كان مقلب ..
و بدون لا يحس قام وقف ..

جمانه الي شافته و عجبها من اول نظره .. بس احساس الكره
كان اكبر من احساس الاعجاب بقلبها ..
ما نست ان خالد احرجها جدام صديقاتها و اهلها و رفض يدخل القاعه .
. و اهي قامت بروحها و هل شي فور دمها عل اخر ..
مشت و يباب ام خالد و خواته يدور بالمكان .. لين وصلت عنده .
باس راسها خالد و قال لها مبروك .. و اهي اكتفت بان تعطيه نظره تراويه
انها مو راضيه عن اي شي من الي صار .

باركوا خوات خالد لخالد و جمانه .. و امه و ام جمانه المثل و طلعوا من الغرفه .

ضلواخالد و جمانه ساكتيين و مو عارفين يبلشون بالكلام ..
جمانه نظرها لي تحت .. و خالد كل شوي يشوفها و يوخر عينه ...
حمد ربه بقلبه انها طلعت حلوه .. عل اقل جمالها يشفع لها و يخليني اتقبلها .
خالد حب يكسر حدة الهدوء الي عمت عل مكان : جمانه كيفك .
جمانه : بخير
خالد : ليه يوم طلبت اشوفك بالملكه رفضتي
و عرفت جمانه على طول ان خالد الي سواه كان السبب فيه هل شي ..
و حطت ببالها انه انسان كريه و سخيف و ما عنده غير العناد .
جمانه : كنت تعبانه
خالد : اها .. سلامتك ..
جمانه سكتت و بقلبها تقول سخيف .. يتحمد لي عل سلامه على شي قبل دهر
خالد : انتي كم عمرك ؟
جمانه باستغراب و بحده : انت متزوج وحده مو عارف عمرها ؟؟؟
عسى تعرف اسمي بس
خالد تنرفز من طريقتها بالكلام ...
من شايفها روحها هذي ... ترى اذا هي مغصوبه انا اكثر منها
: لا ما سالت و ما يهمني .
انقهرت جمانه حيل من كلمة ما يهمني ...
و سكتت و نادت امها عشان بترد البيت ..
دخلوا الام و ام خالد و الخوات و يابوا الشبكه ..
و طلبوا من خالد يلبسها ...

خالد اول ما قرب من جمانه حس بقشعريره بكل جسمه ..
ما حس انه هل مره حلاله و عادي يجيسها .
و بعد اول محاوله قال لاهله ما اعرف لبسوها ..
و لبستها ام خالد الشبكه ... و لبسها خالد الدبله ..
و يوم مسك ايدها قام يقارنها بحجم ايده .. ايدها كانت ناعمه و بيضه و ضعيفه ..
و تختفي داخل ايده و قبضته القويه .
و بعدين طلعت الهنوف الساعه .. و قالت لها هذي هديه من خالد .
استغربت جمانه ... دامها هديه من خالد ليش ما عطاني ياها ؟؟
و لا الاخ مستكثر يتعب نفسه بشي .
شافت الساعه و ردت صكرت العلبه بدون تعليق او بدون كلمة شكرا ..

قاموا جمانه و امها و اختها عشان يردون البيت ...
و كان خالد و خواته تعابى بيصعدون غرفهم بالفندق فوق .

جمانه رجعت البيت و كلها غضب على هل خالد و تقول بقلبها
مو كافي بتزوجه غصب .. لازم اتحمل غروره و تكبره و نفسه الشينه بعد ...
اشهل بلوى الي انحطيت فيها يا ربي ..

خالد الي هزأ الريم عل اخر ..
خالد : تقولين لي شين ما بلاي ها .. انا اعلمك
الريم : هههه . كنت بشوف ردة فعلك ..
خالد : و عسى شفتيها
الريم : اي يووووه الصدمه بانت عليك
الهنوف : مالك شغل فيها .. زوجتك قمر .. و عسل يا خالد طيوبه و حبوبه كثير
استغرب خالد لان ما شاف من جنانه الا غرورها و تكبرها و نفسها الشينه

ثاني يوم من العرس كانوا الخوات حابين يتسوقون بالكويت شوي ...
و لان هذي اول زياره للكويت كلموا جمانه
الريم : قوه جمانه .. كيف حالك بعد تعب امس
جمانه : الحمدالله .. و الله اني نمت لي 3 الضهر من التعب .
الريم : الله يعينك .. كنتي قمر البارحه و خفنا عليك من الحسد
جمانه : هههه تسلميين مو لهل درجه عاد
الريم : لا والله لهل درجه و زود .
جمانه : تسلمين يا قلبي .. من ذوقج
الريم : جمانه ممكن اطلب منك طلب
جمانه : عيوني امري ..
الريم : حابين نتسوق انا و خواتي .. و هذي اول زياره لنا للكويت و مو عارفين وين نروح
جمانه : اسفه والله يا ريم ادري اني مقصره بس تدرين بلوية الحفله ...
انا انشالله اقل من نص ساعه عندكم و اوديكم اماكن راح تحبونها
الريم : لا لا ما بنتعبك .. انتي بس قوليلنا و احنا نروح مع السواق ..
جمانه : لا حشا ما رحتوا مع السواق و بنت عمكم موجوده ..
و بعدين السواق ما يدل .. انا اوديكم
الريم : انتي تسوقيين
جمانه : اي اسوق ...
الريم : يا بختك
جمانه : هههه نسيت انتوا محرومين من هل شي
الريم : اي والله ...
جمانه : خلاص ريوم .. عطيني نص ساعه و انا عندكم .. تجهزوا انتوا بس

لبست جمانه عل سريع .. و حطت ميكب خفيف و راحت لهم ..

و قبل لا توصل

الريم : يبا .. حنا بنروح السوق مع جمانه ... الريم و تطالع امها :
يما و الجهال اهني مع ميري ..
الابو : و من بياخذكم السايق ؟
الريم : لا يبا .. جمانه بتودينا .
خالد سمع انه جمانه بتوديهم و ما حب الفكره ...
خالد : لأ ... انا الي باخذكم
ريم : بس جمانه على وصول
خالد : مو مشكله توقف سيارتها و تالي تاخذها و لا السايق يرجعها .
ريم : بس انا ماقلت لها
خالد : و انتي تبين الاذن عشان واحد يودي حرمته السوق ؟؟
سكتت ريم و عرفت ان هل شي ما بيعجب جمانه .. و بعد شوي

الريم : هلا جمانه
جمانه : يلا ريوم انا تحت الفندق نزلوا .
الريم : اي طيب بس جمانه ... خالد عرف بنروح و صمم انه يودينا
جمانه : شنو .. و ليش ما قلتيلي
ريم : و الله من 5 دقايق رحت اخبر الوالد و سمع خالد و صمم هو الي يودينا و انتي معانا
جمانه عصبت من خالد الي قاعد يتحكم فيها من الحيين و قراراته
قاعد تمشي عليها بمساعدة الضروف الي دايم بصفه ...

نزلوا البنات و خالد كان بسيارته ينتظرهم و يشوف ريم
عطت السويج لموضف الفندق علشان يدخلها الباركينج
اول ما نزلت جمانه .. انصدم منها خالد ..
كانت لابسه جينز سكيني .. و قميص طويل لي الركب ابيض قطن .
. و حاطه شال مخطط بنفسجي و فوشي
و لابسه شيله دبل فيس بنفسجي فاتح و غامج و حاطه ميكب خفيف ..
غلى دم خالد يوم شاف مرته جذي و اهو الي متعود على حياة السعوديات ...
بس ما حب يسوي مشكله من اولها

وصلت جمانه السياره و شافت ان الخوات الثلاث قعدوا ورا ...
و توجهت مباشره للباب الخلفي
جمانه : السلام .. الهنوف نزلي ركبي جدام مهي عدله
الهنوف : لا والله ماني راكبه .. اانتي روحي عند رجلج
جمانه : ما يصير انتي الكبيره .
الهنوف : حلفت ما اقعد .. روحي انتي عروس و قعدي يم رجلج
يت جمانه تركب جدام .. دخلت و سلمت مره ثانيه و ما رد خالد السلام
الي كان بقلبه بركان من الغيره على لبس جمانه الي يشوفه فاضح للخليج
و بالنسبه للكويت لبس جمانه مستور حيل .. قميصها كان وسيع و مكياج هادىء
ما يشوفها الا القريب منها حيل و شيله بلفة عاديه و مرتبه ..

الي قهر خالد اكثر .. ان حتى دبلتها ما كانت لابستها ...
و كان يقول بقلبه هذي حسبالها بهل تصرفات بتنكر وجودي بحياتها ..
و بحركه خفيفه طلع دبلته الي كان لابسها و حطها بمخباته .
دلتهم جمانه على المارينا
و صلوا .. و نزلت جمانه و نزل خالد و شافها مره ثانيه و صار يغلي
صعدوا السلالم .. و صاروا يتمشون بالسوق .. و خالد عينه على جمانه و على الي يشوفها
و كان كل ما شاف احد يطالعها يغلي اكثر و اكثر ...هو مو عارف ان هل شي عادي بالكويت
تشوف الشباب بالكافيهات و ما عندهم شغل غير انهم يخزون الي رايح و الي راد ..

تضايق خالد من الوضع حيل خصوصا بالكورنر الي بالنص ...
حس ان زحمه حييل و مسالة خزني و خزك رفعت ضغطه .
و قالهم خنروح مكان ثاني اهدى شوي .

عرفت جمانه انه ما يحب الزحمه .. و قالت مافي اهدى من الرايه ..
و طلعوا من المارينا و راحوا الرايه.. و فعلا عجبهم المكان ..
خالد قالهم نقعد شوي بكافيه نريح لان تعبنا من الفراره ...
قعدوا و طلبوا .. الا جمانه الي طلبت ماي بس ..
و بعدين ريم و خواتها حبوا يخلون المعاريس بحالهم
عشان يصفالهم الجو للسوالف
الريم : حنا بنفتر فوق و انيت جمانه خلك مع خالد شوي
جمانه : لا انا بي معاكم
ريم : لا لا خلك مع خالد عشان لا يعصب و يرجعنا البيت بدري
و قاموا بسرعه عنها ...
خالد ما قدر يكتم غضبه اكثر
خالد : الحين انتي هذا لبسك دوم
جمانه : نعم ... شنو يعني لبسي دوم
خالد : يعني دايما تطلعين كذا سفور
جمانه لم سمعت كلمة سفور ما قدرت تمنع روحها من الضحك الخفيف ..
خالد اول مره يشوف غمازاتها المرسومين رسم على خدودها
و حس انه قاعد مع طفله بريئه
خالد : قاط نكته انا
جمانه : لا سوري والله ما اقصد .. بس كلمة سفور عندنا نقولها للي مو متحجبه ..
و انت سويتني سفور
خالد : و لا يهمك .. انتي دوم تطلعين كاشفه و مو متغطيه ؟؟ و بدون عباة
جمانه : ايي انا هذا لبسي من سنتين ... انا متحجبه من سنتين
( درت ان هل شي بيرفع ضغطه زياده )
خالد : ماشالله .. يعني كنتي تلبسين اشياء اخس من هذي
جمانه : اعتقد لبسي محترم و مافيه شي ... و انت اذا كنت تبي وحده
تلبس نفسكم ليش يت خطبت من الكويت
خالد انصدم من جراتها ... تنرفز من ردها حيل ... و قال لها قومي نمشي
جمانه : يكون احسن
تنرفز خالد حييل و حس ان كرهها بقلبه زاد .. دلوعه و مغروره و شايفه روحها
و محد يقدر يكلمها بكلمه
ردوا جمانه و البنات مع خالد .. و ركضت جمانه و قعدت ورا قبل لا يوصلون خواته
تنرفز خالد منها حييل و عرف انه بيتعب معاها وايد ..
وصلوا الفندق كانت الساعه 9 .. سلمت جمانه على بنات عمها
و راحت بتركب السياره عشان ترد
خالد : لحظه لحظه ... وين على الله
جمانه : بيتنا .. و لا تبي اخذ الاذن منك بعد
خالد : و ليه ما تاخذين الاذن .. مو انا زوجك و مسؤول عنك الحين
جمانه : انشالله استاذ خالد .. ممكن اروح البيت
خالد : لا طبعا مو ممكن .. امشي معاي اوصلج البيت
و السايق بيلحقنا بيودي سيارتك البيت .
جمانه : و ليش كل هذا
خالد : الوقت متاخر .. شلون بترجعين لحالك بهل ليل .
جمانه : ماحب السايق يسوق سيارتي و تترس ريحته السياره ..
خالد : اتعب عل ريحه .. الي يسمع يقول ريحة سيارتك مسك .
صكر خالد باب سيارته و راح خذا السويج من جمانه ..
و عطا سويجه للسايق و قاله الحقنا .
جمانه : انزين خلني انا الي اسوق
خالد : لا والله و انا كيس رمل اجلس جنبك و انتي تسوقيين
ركب خالد السياره و تفاجأ بريحة السياره الي كلها عود و بخور ..
ركبت جمانه يمه ... و كانت هذي اول مره يكونون بمكان بروحهم
خالد ارتبك شوي ... حس بحرارة و يمه بنت قمر مثل جمانه
جمانه الي كانت منحرجه شوي ..
خالد : جمانه طلعي جوالك و سجلي رقمي
جمانه : اخذه من البنات .
خالد : طلعي جوالك .. و عطيني رقمك الحين ..
و لا عاد تقولين لي كل شوي البنات البنات .. انتي متزوجتني انا و لا البنات
جمانه طلعت الموبايل .. و نقلت رقمه و دق عليها رنه عشان تسجل ...
سجلت الرقم باسم خالد ..

خالد : ممكن اعرف ليه حضرتك مو لابسه الدبله ؟؟و لا ما تمشي مع الوان قميصك
جمانه : نسيت ... و اضن انت بعد مو لابسها
خالد : انا رجال و مو بملزوم البسها
جمانه : و انا مره و ماعتقد ان الدبله بس اهي الي بتربطنا بعض
خالد : بس عل اقل لي شافوها الناس على ايدك دروا انك مخطوبه
جمانه : ما يهمني الناس يدرون
خالد بصوت علي شوي : بس انا يهمني الخمه الي يلحقونك بنظراتهم يدرون
جمانه خافت لا يحتد الموقف اكثر و سكتت
حس خالد ان غثها وايد اليوم .. و رفع صوته وايد عليها و سكت اهو الثاني
و ما عرف يصلح الموقف .
سفط خالد السياره بكراج بيت جمانه و نزل ..
سلمها المفتاح .. و خذت جمانه المفتاح و مشت بدون اي كلمه
انقهر خالد من تصرفها و دز لها مسج ( الناس تسلم و تقول تفضلوا )
ردت عليه جمانه ( الوقت متاخر .. و سلمت بقلبي )
مشى خالد و كله قهر من جمانه الي ما طوفت فرصه الا و رفعت ضغطه ..
و كل ما تذكر نظرات الشباب لها كان يعصب زود ...
و برر غيرته ان غيره طبيعيه من واحد على زوجته الي تعد من محارمه و فوق هذا
جمانه بنت عمه ...
و بعد يومين .. ردوا عايلة بو خالد السعوديه بعد ما ودعوا البنات جمانه و امها..
و ردت جمانه لحياتها الطبيعيه ... و نست انها مملوجه او في شي يربطها بانسان
و رجع خالد لشغله و كان بين فتره و فتره يذكر جمانه
و يتمنى يشوف منها اي مبادره تقرب المسافات البعيده
بينهم ...

وللقصه بقيه

يالله ابي اشوف ردودكم وارائكم